痴工人姐姐唔痴媽咪？

擔心小朋友痴工人姐姐唔痴媽咪，相信出現喺不少在職媽咪嘅苦惱排行榜上。生寶貝女之前我同一個朋友講呢個擔憂，佢話小朋友番學老師都會教，媽咪嗲哋得一個，係冇得取替，小朋友就自然會鐘意痴你多啲。真係咁簡單？

都係嗰句啦，呢個世界係冇不勞而獲架，就睇吓你付出幾多。以下幾個係我一直以來堅持嘅原則：

1. 番到屋企，放低工作，做番媽咪

喺公司受老細氣，受客氣，咁又點？做客服嘅經驗話俾我知，收咗工就要放低同忘記，放低情緒，忘記疲累，唔好俾呢Ｄ負面野影響你同屋企人愉快嘅時間。我番到屋企，凡係同個囡有關嘅野我都會自己做番，例如同佢玩、換片、沖涼、換衫、讀故事．．．本身呢Ｄ就係媽咪嘅責任，日頭係工人姐姐做，純粹因為我唔喺屋企，番咗屋企就冇得偷懶架喇！

2. 出街唔同姐姐一齊

出街有冇見過工人姐姐抱小朋友，媽咪同爸爸揹袋？有冇見過酒樓食飯係工人姐姐餵飯，而媽咪爸爸就自在地食緊飯？其實好奇怪，可能係Ｄ姐姐太好，總覺得呢Ｄ係辛苦嘅事就主動話要幫手，唔俾佢幫佢又好似冇野做，所以，就當我係一個絕情嘅僱主啦，我真係好少同姐姐一齊出街，我寧願自己抱，自己一袋二袋咁出街，我都想自己做番晒媽咪應該做嘅野，更何況星期一至五要番工，親子時間已經少，星期六出街仲要帶埋工人姐姐，我真係唔制呀！

3. 培養溫馨小習慣

番工之前，我都會要求同寶貝女攬攬同goodbye kiss，瞓覺之前又要一個good night kiss，我好想透過呢Ｄ 小動作去話俾寶貝女知，我真係好愛佢，慢慢佢就會感受到，而佢亦都會同類似嘅方法表達佢對你嘅愛，真係sweet到暈架！

其實講到尾，可能只係我想痴住個女Ｄ！哇哈哈哈哈．．．．．

媽咪最鐘意同寶貝女玩自拍！哈哈！

俾小朋友一個合理o既期望

從事服務性行業多年，合理嘅期望用喺客人身上避免投訴就多，但係原來對於小朋友亦十分適用。

話說寶貝女幾個月大嘅時候，我得閒就會上網搵資料，人哋話，要求小朋友做一件事之前，要預先俾佢知道，加上一連串嘅道理，慢慢就可以避免扭計或者唔妥協嘅情況。由嗰陣開始，我努力嘗試，而家睇番轉頭，似乎真係work喎！

好似去打針咁，有D父母選擇瞞住小朋友，但係去到打針o個刻，小朋友知咩事嘅時候就爆喊；有D就同個小朋友講“唔痛架！”（你呃人！）；我就選擇講個真相俾佢聽：首先同佢講吓點解要打針，之後醫生會點樣同佢打，打完之後會有咩感覺，我寫得出嚟，佢梗係冇喊啦，醫生同姑娘都話佢叻女呀！

去公園玩到唔肯走，我諗個個小朋友都試過，寶貝女都有，但係真係好少。曾經聽過D父母同小朋友講，玩多10分鐘就走喇！冇錯，佢係有同個小朋友講佢嘅預期，不過小朋友明唔明先？學咗睇錶未？有冇時鐘俾佢睇住幾時夠鐘？用小朋友明白嘅語言，佢哋聽得明先會跟你嗰套架嘛，例如：sir多兩次滑梯、媽咪圍住公園行多一個圈…… 如果個要求客觀易明，大家都冇得抵賴啦！

寶貝女細個有食手指嘅習慣，外國啲專家話兩歲左右就自己會戒，唔好信！又係呃人架！戒食手指嘅過程相當艱苦，好在佢一早知道晒我嘅計劃：手指水。媽咪講到明（揸住個月曆講），x月x日開始搽手指架喇，好苦，不過為咗佢嘅牙仔，一定要成功呀！搽幾耐呢？媽咪好樂觀地喺月曆上圈咗6日（有嘢睇容易明），我哋最少搽6日，但係呢6日中間再食1次，就加1日，食2次就加2日…… 過程當然辛苦，媽咪都要不停鼓勵同讚賞，但係得到嘅唔單止係6日真係戒得甩唔再食手指，仲有佢嘅堅忍同明白事理！

幾時開始用呢個方法好呢？太細個會唔會唔明架？

個人認為，小朋友好細個就應該開始，我唔知佢明唔明，但係呢個方法絕對需要練習，小朋友大咗先嚟開始用，父母係咪可以即時pick up到呢？生命工程師嘅“建築”技巧都需要practice makes perfect架！

雖然我都聽媽咪講道理，但係我都好古惑架！

睇書最緊要方便

Ｄ書方便Ｄ攞，方便Ｄ搵，先有心機搵黎睇架嘛！

好似某Ｄ公共圖書館咁，亂七八糟，跟住索書號搵到唔會搵到，簡單以英文Picture Book（J）為例，Ｄ圖書管理員只係求其放入去個大書櫃，根本都冇再理佢係J-HAR、J-BAR、J-SUT等等，同系列o既書又唔放埋一齊喎，搵死人咩！（真係講起都嬲）不過我相信都係人流同工作量o既關係啦，因為有Ｄ遠少少、少人Ｄ o既圖書館真係好好、好整齊架！

咁屋企o既書又點呢？當然都係以整齊為主！

首先要一個o岩小朋友高度o既書架／書櫃，再將圖書分門別類，同語言o既放埋一齊，實用性o既放埋一齊，圖書館借番黎o既放埋一齊（撈亂咗一定會唔記得還囉！）。另外有一個幾重要o既point係，千祈唔好將D書放得太密，小朋友手仔都未夠靈活，書脊又未必有資料，點搵呢？書櫃入面多D空間O既話，睇完o既書又可以等佢地自己放番上個書櫃度，培養閱讀習慣，同時培養自己收拾o既習慣，一舉N得！

隨住年紀增長，4歲o既寶貝女已經睇少咗繪本，多咗睇有文字o既故事書喇！我買o既書都好"立雜"，但係一見到佢o岩睇，我都盡量買番o個個系列，唔駛煩！

寶貝女專心睇書個樣引死人喇！

媽咪最鐘就係影我個寶貝女專心睇書o既呢個樣，梗係啦，鐘意閱讀o既習慣，得來不易架嘛！

其實最初o係佢好細個o既時候，我只係希望佢自己入睡，其中一個方法就係培養佢o既bedtime routine，由換片、搽lotion、換睡衣、坐大脾讀故事、抱住唱歌再放落床仔，每樣都係瞓覺之前必做o既事；當然，細個o個陣佢o既專注度好弱，可能一、兩分鐘已經扭黎扭去，但係對住我呢個好勝媽咪，我唔成功，佢當然冇得走啦！慢慢越讀越長、越讀越耐，而讀故事就變成我同佢o既親密時間。

雖然本身我個人無乜創意，但係可能我太鐘意講野，我同佢讀書o既時候，見到一幅圖畫都可以引伸好多野出黎，所以令我覺得一本ｂｂ布書都有好多野可以講；例如：書裡面有一隻牛，媽咪會扮牛叫聲”moo moo”，又會叫佢摸吓牛仔，又會扮拎牛奶出黎叫佢扮飲．．．有咁搞笑得咁搞笑，有咁誇張得咁誇張，有咁大動作得咁大動作，引到佢注意，又有互動，自己又開心（唔生個女都唔知原來自己有少少搞笑細胞架！）。

oh btw，我唔係全職媽媽，我在職架，當然各有各辛苦，但係「生命工程」呢個project起咗個頭，冇得quit架嘛，辛苦都要架啦！

我的教養態度

講真，做人經驗唔算多，點樣先可以教好我個女呢？

睇過一本書，佢話”蓋樓房需要專業的建築師，拯救生命需要專業的醫生，培育孩子這「生命工程」就需要專業的父母。”

就係呢句說話，我覺得自己真係要認真學習下，就開始搵好多唔同o既育兒書、親子書黎睇，學下人地點教仔，又學下點留意小朋友o既需要，點發展佢o既個人才能等等！

希望呢個平台，除左可以分享一Ｄ教養o既小故事，仲可以俾我記低寶貝女o既生活趣事，日後睇番，相信一定回味無窮！